Psalms 103
Anatunya Mona Retenge Doko
1Nambana imambu dokome Kamongo doko lakandarowale.Nambana yongope suu pingi imambupi peparaeme banya kingi poo pyasi doko lakandarowale.
2Baa anjiki pingi doko kame soo kaeya nao
nambana imambu dokome Kamongo baa lakandaro.
3Baame nambana koo dupwa peparae nyuo anamasi minyuo
baame nambana anga yakane peparae pyuo lete nyuo mee ingingi.
4Baame nambamalu anda pasarene lao minyaro karenge.
Baame sakame kumapala mona reto nyisingi.
5Baame bange keyange renge dupwa namba keta palyuo simbwange.
Dokona namba enenge ingyuo karo yaka kambe yongo nyuo kararo.
6Kamongome mondo lao yapalyuo wambu koo keta palyuo isingi dupwana lao rolo
nakama nyelana pyuo karenge dokoko maingi.
7Baame yulu lao masiyamo dusipa Mosese keta paneya.
Dopa pyuo Isaraele wambu dupwame banya yulu porai dupwa kandena lao piya.
8Kamongo doko baame sakame kumuo mona reto pingi.
Baa waiya lao imbwa nao mona reto puupenge.
Renge doko baa keta palyuo pyoko pyoko lenge.
9Baame lao nembo pyalana pyuo karalu karo pii nange.
Baa imbu singi nyuo karalu kara nange.
10Namwa randa nyeramali dokona baame randa jii nange.
Namwana koo kyai pyuo pingi dupwana yano nyeramali dokona yano pyara nange.
11Wambumi baa ketae pyambungi dupwa keta banya mona retenge renge doko
isa yuu dakena piso yake sungange dopale ingyuo mona retenge.
12Neta epenge dokona piso pao neta yalyingi doko londesa dopale
baame namwana koo dupwa nyuo kame soo nyuo nembakange.
13Rakangeme banya ikinyingi kando yako yako lao anjiki pinginyili pyuo
Kamongome wambu baa ketae pyambungi dupwa pipya anjiki pingi.
14Baamenamwa akimi wasisi karaminyi lao soo karamo.
Namwa sinjimu dokome wasisikande lao soo karamo.
15Akali doko banya lete karene doko isoko dopakale.
Baa ando karo epaleta isa jingi apu epelyamo dokopa elyape ingyuo lyuo panyi pilyamo dokopa loo lao pingi dopale.
16Enakana porambaiye dokona minyilyamo dokopa soo neta penge.
Mendeme dee kamba silyamo kanda nange.
17Dopa pyuo pelyamopape wambu baa kingi ketaepyambuo lakandaraminyi dupwa
Kamongona mona retenge doko nakama keta sulu soo singi.
18Banya kana minyuo lalu lao lenge doko minyaro karengepe
dee banya mawa pii yaki nyii nao rape rape lao minyingipi dupwana para pyao nyerami dupwa keta
banya keyange renge soo puu pao penge.
19Kamongome baa yake panda dokona kiŋi ingyuo pisipala
wambu peparae rapu pyuo karamo.
20Nakama aŋala porai
banya mawa pii rape rape lao piraminyi dupwape
baa laramopii doko waa lao kale yukupala soo pisiraminyi dupwapeme
Kamongo doko lakandarami.
21Nakama yake dokona karenge banya kendemande dupwa
baame pimili lao suu pyapyamo pilyaminyi dupwame Kamongo doko lakandarami.
22Yuu baame isilyamo dupwa peparaena kata papingi bange peparae Kamongo wasiyamo dupwame
baa lakandarami.
Dopako pyuo namba Kamongodoko lakandarowale.
Copyright information for
KYC